Қарағанды облысы, Абай аудандық орталық мешітінің  діни сауат ашу курсына қатысып, Құранға түскен әйел-қыздар жамағатына  арнайы сертификат табысталды.

Марапаттау рәсіміне арнайы шақырылған Қарағанды облыстық «Әнет баба» мешітінің ұстазы Арай Серғалиқызы  білім қуған шәкірттерге дініміздегі білім алудың орны мен Құран оқып-үйренудің шарапаты туралы уағыз айтты.

Бір қолымен бесікті, бір қолымен әлемді тербеткен қыз-келіншектер мен аналарымыздың білімді болып, Құранды еркін оқып, түсіне алуы келешек ұрпақтың тәрбиелі, иманды, көреген болып өсуіне үлкен септігін тигізетінін атап өтті.

Іс-шараны ұйымдастырып, бас-қасында жүрген Абай аудандық мешітінің ұстазы Дюсенбай Ақбота Қайратқызы  білім алған шәкірттерге алғыс білдіріп, олардың білім сапарына сәттілік тіледі. Сондай-ақ, дініміздегі білім алушылардың артықшылығы туралы айтты.

Шара барысында берекелі дастархан жайылып, әжелер қауымы ақ батасын берді.