Жезқазғанда жаңа мешіттің қазығы қағылды (фото)

Бүгін Жезқазған қаласының жұртшылығы жақсы жаңалыққа куә болды. Қазақстан Мұсылмандары Діни Басқармасының Қарағанды облысы бойынша өкілі Өмірзақ қажы Қазкенұлы, Жезқазған қаласының бас имамы Тағаев Нұрбол Сайлауұлы, ҚМДБ-ның  «Халал Даму» ЖШС-ның Қарағанды облысы бойынша өкілі Абдрахманов Ысқақ Рахимбекұлының және қаланың құрметті азаматтары мен жамағатының қатысуымен жаңа мешіттің қазығы қағылды. Естеріңізге сала кетсек,  кәсіпкерлердің демеушілік етуімен және қайырымды жандардың көмегімен жаңа мешіттің бой көтеру жоспары алға қойылған болатын.

Бұл рухани  іс-шараға Қарағанды облысының өкіл имамы Өмірзақ Қазкенұлы Бекқожа  арнайы келіп, мешіт салынатын жерге қазық қағып, алғашқы іргетасын қалау рәсімін өткізді. Сондай-ақ, жамағатқа өзінің ыстық лебізін білдірді. Құран оқылып, уағыз-насихат айтылды. Осы сауапты іс үшін арнайы мал сойылып, дұға жасалды.

Рәсім аяқталған соң  барлық жамағат бір ауыздан Жезқазған қаласының «Ахмет Ишан Оразайұлы» мешітінде жайылған дастарханда бас қосты. Дәл сол уақыт аралығында жаңа мешіттің құрылысына 60 000 000 (алпыс миллион) теңге жиналып үлгерді. Сонымен қоса, қала белсенділері де мешіт құрылысына ат салысып, қаржылай көмек беретіндерін жариялады. Осындай белсенділікпен басталып кеткен игі іс көктемде толықтай жүзеге асып, құрылысты бастамақшы. Әрине, алдымен мешіттің құжаттарын бір жақты ету жоспарланып отыр.  Алдағы уақытта аталмыш мешіттің құрылысына көмек көрсетіп, қол ұшын беремін деуші мұсылман жандарға толық ақпарат берілетін болады.

Алла үйін салып, құлшылық орындарын көбейту сауапты әрі игі іс. Осы іске бастамашы болған барлық азаматтарға Алла Тағала разы болсын!

© 2009-2024, Қарағанды облыстық мешіті Сайт материалдарын қолдану үшін