Қазақстанда дәрі-дәрмек жайлы толыққанды ақпарат беретін жаңа веб-сайт іске қосылды. Дәрі-дәрмектер туралы деректер базасы денсаулық сақтау министрлігінің тапсырысы бойынша әзірленген.
«KNF.KZ» сайты ақ халаттылардың жұмысын жеңілдетуге және науқастарға тез сауығып, аз шығындалуға мүмкіндік береді, яғни, дәрілердің тиімділігі туралы пікірлер мен әр түрлі ауруларды емдеу бойынша ұсыныстар жинақталған. Сондай-ақ, қымбат дәрі-дәрмекке балама боларлық арзан препараттың да бағасы көрсетілген. Базаны дайындауға британдық формуляр әзірлеушісі Дункан Энрайт атсалысқан. Оның командасында отандық мамандар мен Еуропаның оншақты сарапшысы жұмыс істейді.
«Қазір базада жеті жүзге тарта дәрі-дәрмек атауы бар. Бірақ жақын арада Қазақстанда тіркелген барлық дәрілерді тізімге енгіземіз. Тиімсіз дәрі-дәрмектерді де қосамыз. Онда бірден пікірлерді, рейтингтер мен дәрілердің арзан аналогтарын көрсетеміз. Біз сайтты үнемі пысықтап, жақсартып отырамыз», - деді Қазақстандық ұлттық дәрілік формулярды әзірлеуші Дункан ЭНРАЙТ.
Формулярдың ерекшелігі - дәрі түрін жылдам іздеуге және әлемнің әр түкпіріндегі дәрігерлердің пікірін бірден көруге мүмкіндік береді. Қазақстандық формуляр қазірдің өзінде орталық Азияның ең үздігі танылды. Сондай-ақ, қазір фармацевтер міндетті медициналық сақтандыру тізіміне енетін дәрі түрлерін талқылауда.